ÅRSRAPPORT

Mimrekveld over året som er slutt. Hendingar på godt og vondt. Ei siste lenke som var meint å vere livsvarande, er broten. Det blei slik. Eit kjært familiemedlem omkom på tragisk vis. To gode firbeinte vener reiste til dei evige jaktmarkane. Vakkert bryllaup samt barnedåp, for eldste sonen, på solskinsøya, i juli. 

Nye bekjentskap har komt og forsvunne etter kortare eller lengre tid. To-tre har likevel vorte nære vener. Den eine veldig nær. Nyåret vil vise seg om det utviklar seg positivt eller avsluttast. 

Økonomien har vore utruleg krevjande og vil fortsatt bli det i nyåret også. Aldri har eg hatt inkassokrav før. Eit nytt bryllaup, samt barnedåp er fastsett i mai.

Eg ser fram til eit spennande år, nye utfordringar, men også gleder, vil eg tru. Men husk at mykje blir kva ein sjølv gjer det til og ligg i våre eigne hender. 

ΚΑΛΗ ΧΡΟΝΙΑ/kali kronia = godt (nytt) år

GLEDER

 

Jau kvar dag har sine små og større gleder. Om eg bevegar meg utanfor heimen sine trygge murar, treff eg kjekke folk som smiler, helser, småpratar og tilmed tilbyr meg skyss, sidan eg for tida er billaus. Kor heldig eg er, tenkjer eg. 

Dernest gler eg meg over meldingar eg får, både med og uten bilder,  telefonprat og intressanne muntrande chattar på nett. 

 Dagane går jammen fort i mi sjølvvalde einsemd. Eg ler litt over han som prøvde lure meg. Heile historia enda med at eg fekk ei ny og kjekk veninne som også nesten blei lurt av same fyren. Vi har flira godt av dette i ettertid og sendte han tilmed ei takkemelding for at vi hadde blitt kjendt via han. Han svarte sjølvsagt ikkje, men hadde lese den, kunne vi sjå. So kven lurte kven her? 

χαρες και κοροιδα/hares ke koroida = gleder og lureri

LURERI

 Eg undrast stadig over kva glede somme har av å lure andre. Løgner og falsk identitet, eller endå verre, stele ein annan sin identitet. Vert vedkomande konfrontert med sanninga, blir han sur og/eller blånektar. Det er omvendt, det er den andre som har misbrukt svindlar sin identitet. Er dette ein ny "sport"?

Eg har gått på nokre falske veneforespørslar, men har lært metodene dei ofte brukar. Ei masse smisking og lovnadar og dei set ofte i høge stillingar. Amatørane brukar denne metoden. Dei meir erfarne, er intresserte i deg og spør, samt skriv om ver, vind og aktuelle ting. Dei testar intelligensen din, før dei kjem til saka: Pengar til livsviktige ting, for av ein eller annan grunn har dei ikkje tilgong til kontoen sin. Men eit Applekort kan fikse det. Angåande smisking om mitt utsjåande, so er eg ganske klar på korleis eg ser ut og kva eg kan og ikkje kan. So kom ikkje her. Og pengar har eg ikkje. So den er grei. Eg testar tilbake, er med på moroa. Ofte ignorerar dei spørsmåla, eller blir sure og spør om eg ikkje stolar på dei??? Skal eg stole på ein person eg ikkje kjenner og aldri har møtt og som påstår eg er den mest fantastiske personen dei har komt over i sitt liv, hittil? Hahaha...eg må ta meg ein høg ein.

I Afrika finnst der skular som gir undervisning i korleis svindle "dumme" kvinnfolk. Jau det er heilt sant!! Norske, einslege kjærleikshungrige damer er perfekte offer. Kven likar ikkje vakre, kjærlige meldingar?  Alle likar å høyre ros og fagre ord. Vi likar å vere likte. Iallfall ikkje mislikte. Vi veks på det fyrste. Egoet vert styrka. Det andre kan køyre oss nedi djup depresjon, om ein har sarte kjensler.  Ein lærer seg å vere på vakt heile tida. Kven er til  å stole på og kven er det ikkje. Ein spør litt rundt omkring, forsiktig, for ein vil ikkje vise seg mistenksam heller. Det er for dumt. Ein vil då stole på folk! 

Korleis har samfunnet og verda vorte i den siste tida?  Tilmed dei som skal styre landet vårt lovar og lyg. Korleis vite kven ein skal stole på? 

ψεύτης/pseftis = løgnar

 

I NAUDA

 

Ja, i sanning, det er i nauda ein kjenner sine vener og kven som har medkjensle. Dei ein trudde på, snudde ryggen til. So har ein iallfall fått klarlagt det på slutten av livet.  Dei ein venta minst ifrå dukka imidlertid uventa opp, og vil også bli huska. 

Siste døgnet har vore ein augneopnar i så måte. Helst vil ein gi blanke når problem dukkar opp, men ein vert tvinga til å gå vidare, tross alt. Prøver fortvilt å finne ein veg. Ei meining. Prøver også å ikkje vere bitter, skjønt akkurat det er vanskelig. 

Utakk er verda si løn, seiest det. Også det er ei sanning. Og for sine gjerningar skal ein visstnok bli huska...

Αγωνια/agonia = naud, angst

PROMISES - LOVNADAR

 

Eg likar dårleg ordet promise, å love. Lovnadar vert som oftast ikkje heldne.

Kvifor? Fordi ting skjer - heile tida. Ting som ein ikkje  forventa, men også fordi ein rett og slett ikkje tek ein lovnad på alvor.  

Berre eit ord - der og då. Derfor seier eg til vedkomande: nei ikkje lov noko, eg vil ikkje ha din lovnad, ein veit aldri kva som kan skje. Eg vil ikkje bli skuffa. 

Sjølvsagt går det an å ta kontakt å forklare kvifor ein ikkje  kan halde lovnaden. 

Men det vert ofte ikkje gjort, iallfall ikkje på førehand. Og eg vil ikkje tenke om deg at du kanskje ga blanke i lovnaden du gav meg.  Soleis slepp både eg og kanskje også du, å ergre oss. So slutt å love.

Υπόσχεση/iposkesi = lovnad

NETTKONTAKT

 Fleire har heldigvis fått med seg at eg måtte skifte Fb-profil. Eg vart hacka. Vener tok til å få meldingar frå "meg" som eg aldri hadde skrive. Dei oppfatta raskt at det ikkje var meg, m.a. fordi eg aldri skriv bokmål. Eg skriv ALLTID nynorsk. Eg brukar no min greske identitet som ikkje alle kjenner til her. Heldigvis har det lukkast meg å "hanke innatt" fleire av mine gamle FB-vener. Noko godt har komt utav det likevel. FB-vener som berre hang på for å fylgje meg, men aldri kommenterte eller posta ei setning sjølve, har ramla av. Må tilstå at eg har lite sans for slike. Oppfattar Fb som ein sosial arena, med utveksling av idear og meiningar. Nokre av mine aller nærmaste vener er ikkje på FB. Vi har likevel framifrå kontakt på andre kanalar som Skype, WhatsApp, Messenger m.fl. Å ikkje ha nettkontakt no for tida, er mest utenkjeleg. Det gjeld også alle offentlege instansar.  Ei utvikling som er både negativ og positivt lettvint. 

Men kva når nettet sviktar?

Utruleg sårbart dette. Eller finnst der ein plan B? Må vi attende til røyksignal for å kommunisere over avstandar? 

Διαδικτυακή επαφή/diadiktiaki epafi = 

nettkontakt

SVINDLARENS ABC

Fyrst leitar du på Facebook, Skype og alle sosiale medier etter eit passande offer. 

Helst ei vaksen, einsleg dame. Desse er ofte formuande og kjærleikssøkande. Du ber om vennskap fordi du har lagt merke til henne spesielt, utifrå bildet. Ho ser intelligent ut, snill og ikkje minst vakker. Har ei særskilt utstråling. Ho godtek forespørselen, og so er de igong. Du pøser på med smiger og fortel nokre truverdige løgner om deg sjølv. Du har eit solid yrke som du har streva deg fram til åleine, fordi du blei tidleg foreldrelaus. Du er enten, lege, advokat eller har ei sjefsstilling i eit større firma. Du er diverre enkemann. Kona di omkom i ei stygg ulukke eller ho dauda av ein alvorleg, ulækjande sjukdom. Du har ein son på 13 - 15 år. Han går på internatskule medan du må jobbe langt ifrå heimlandet for å brødfø dykk begge. Du gir tilmed adressa og eit bilde av guten, slik at ho kan korrespondere med den morlause, om ho ynskjer det. Du får full sympati. Du skriv at du forsovidt har lagt alt dette vonde bak deg og at livet må gå vidare. Du ynskjer ei god kvinne i livet ditt, som også vil godta sonen din.

Korrespondansen mellom deg og kvinna utviklar seg. Den vert varmare og går over i forelsking frå hennar side, og du jattar med, og er like forelska. Ja de tek tilmed til å diskutere framtida ilag.  Ho vil ha videochat, men det er sjølvsagt umogeleg og ulovleg der du jobbar. Ho godtek det under tvil. Men no vert ho krevjande og vil treffe deg og meinar det er på tide med eit fysisk møte. Du forklarar med stort tolmod at du kan ikkje forlate jobben før kontrakta er over, og du må antaglegvis vere lenger for du har gjort ein feil som du må rette opp att ved å vere enno ei stund. Du har tenkt for mykje på henne og vore uvøren i jobben. Men ho kan få chatte med sjefen, som sjølvsagt også er du, men med eit anna namn. Ho vil det, og ber høfleg og inntrengjande om at partnaren hennar må få fri eitpar veker, so dei kan planlegge framtida facetoface. Sjefen er av den forståingsfulle typen og seier han skjønar absolutt det. Han vil gi deg fri eitpar veker mot ein viss sum, fordi denne uerstattelege mannen vil vere eit tap for firmaet den tida han er borte. Ho maktar ikkje innfri kravet. Du gidd ikkje meir, sjølvsagt, forsvinn stille og roleg, blokkerar  og går vidare til neste offer. At kvinna set at med "blødande" kjærleikssorg gir du blanke i. Dette er "jobben" din og pengar må du ha som alle andre. Teite kvinnfolk er det nok av rundtomkring, og det er ikkje din feil. Du har familie i Afrika, eller du har tilvendt deg ein høgtståande livsstil. Dette er ein forholdsvis enkel jobb som er mogeleg å handtere lettvint med ordliste som hjelpemiddel, og du kan samstundes kose deg med kat eller eit anna himmelsk rusmiddel. Du er umogeleg å finne i den afrikanske jungelen. Dessutan har du ikkje gjort noko straffbart, anna enn at du har lånt andre sine bilder og profilar. Det strenge europeiske rettssystemet kan derfor vanskeleg straffe deg...

τιμωρειται/timorite = straffbart