Μια νηκτα/mia nikta = ei natt
tirsdag 1. august 2023
EI SUMARNATT
Dei høge
grantrea som omkransar og verner huset, står heilt i ro. Ikkje ei einaste
vinkande grein. Ein god nattesomn høyrer fortida til. Derfor set eg like gjerne
oppe desse lyse sumarnettene. Tenkjer, grublar, skriv litt og mimrar om farne
tider. Det er stilt, men noko rører seg likevel. Piggsvinet gumlar
hundecornflakes på trappa før det vraltar bortover plenen på jakt etter ferskt
sneglekjøt. Eit par hjortar vågar seg nær huset. Vakre, stolte dyr. Ein sky
puse leitar også etter mat, men vert livredd når eg snakkar til han med lav
stemme. Likevel stansar han opp. Visstnok ikkje van å bli tilsnakka på venleg
vis. Eg får vondt av han og tenkjer han kan bli min om han vil, skjønt det
vil ta tid og tolsemd. Utpå
morgonkvisten når det lysnar mot dag, vaknar småfuglane. Trosten flyg rett på
morellene eller blåbærlyngen. Svalene set seg på straumledninga og pussar
fjørdrakta. Nok ein ny dag, og den teiknar til å bli bra, men skodda sig sakte
innover fjorden og legg seg som ei tjukk dyne over fjella og blir der
verande. Eit grått tak legg seg over
folk og land. Igjen. Og øydelegg ein del av dagen. Eg legg meg i von om ei lita
soveøkt.
Abonner på:
Legg inn kommentarer (Atom)
Ingen kommentarer:
Legg inn en kommentar