Eg landar ved
midnatt på mi kjære øy. Eg er fyrst gjennom kontrollen. Utolsam. Ei nidkjær
vakt stansar meg: Your suitcase? Har ingen, repliserar eg. Why? Eg bur
her…elles er det ikkje di sak kva eg har med eller ikkje, men det sa eg ikkje, hasta
berre vidare utav hallen. «Den lille hvite» ventar på meg som avtalt, skjønt eg
leitar litt før eg finn den. Kretanettene er mørke, men den «vesle» lyser opp i
natta, når eg etter kvart får auge på den med mitt aldrande syn. Fyrste gong eg
køyrer «jernseng» som Citroen blei kalla før i tida. Men vi finn straks tonen
og sig avgårde i austleg retning mot Souda og Rethymnon. På motorvegen held eg
mitt eige tempo opp mot farstgrensa og held godt til høgre for å sleppe andre utolsame
billistar forbi. Nok av dei. Blinkande frontlys og irritert tuting i ryggen,
vil eg helst unngå. Eg har natta framfor meg, ja ein heil ferie, faktisk. Eg
nyt det og hastar ikkje. Men hei, kva er dette? Den kvartfulle månen gøymer seg
brått, og eit dundrande vassfall frå oven veltar over både bil og veg. Og det
veit eg frå før: når himmelen opnar slusene over Kreta, vert Victoriafallene
minimalistiske i samanlikning. Rundt neste sving er vegbana turr. Ahh, du
kontrastfylte øy, velsigna av gudar!!Dei kjende duftene og ein god havbris driv
inn gjennom det halvopne vindauget og gjer meg salig avslappa. Det er mange månadar
sidan sist. Eg sniglar vidare og må svinge unna eit svært bikkjedyr midt i
vegen. Stakaren trong kanskje hjelp eller ynskte ein brå død. Ikkje veit eg.
Eit stykke vidare hoppar ein annan forvilla skapning ut på asfalten. Bråbrems.
Ein søt, liten harepus. Lett forvirra hoppar han fort inn i buskene att. Ved
Georgiopolis huskar eg brått eit unikt lite hotell med norsk og venleg
betjening. Skal eg stikke innom? Det er seint, men truleg er folk oppe der
enno. Ein annan gong, kviskrar eg til den kvite, og vi putrar vidare. Eit
nattbad freistar…men det er mørkt. Eg er åleine. Best å dryge det til
morgondagen ved dagslys. Ein kilometer frå bustaden finn leigebilen ut at han
skal takke for seg. Han vil ha næring, oppdagar eg. Ikkje enkelt. Klokka 01.30
er alle påfyllstasjonar stengde her.
Puuhh, dette burde leigefirmaet vite. Dei skal jammen få høyre det ved
opningstider. Kvitingen vert forleten, nesten midt i vegbana, i von om at han
får kvile ifred til han får nytt fyll, om nokre timar. Eg er forbanna og tek
fatt på siste rest av reisa. Til fots!
Ειμαι νευριασμενη/eime
nevriasmeni = eg er sinna
1 kommentar:
Håper du snart skriver mer. Artig gresk-kurs på slutten av innleggene :-)
Legg inn en kommentar