SNART SLUTT?

Eg tenkjer sjølvsagt på 21.desember som er spådd at det då skal skje dramatiske endringar på kloden vår. Ja, nokon meinar tilmed at då vert det ”svart skjerm”. Finito finale.

Slutt på alt.

Vi her heime på Nisseberget, har vel knappast høyrt om Mayane og deira tidsrekning, før no. Men i desse dagar fløymer nyhendekanalar og anna media over om, ja, akkurat Mayakalendaren. Ny start, seiest det, for dei snille, kjekke og greie. Denne har eg høyrt før, då eg vart indoktrinert av ein svoveltalar på søndagsskulen, for 50 år eller so, sidan. ”Om du lyg, ser Han deg, om du stel, ser Han deg, om du misunner nokon, har vonde tankar, gjer dårlege gjerningar, ser Han deg. Han ser alt, og sender deg lukt ned i svarte holet om du ikkje trur på Han”. Trua mi har vorte noko utvatna med åra. Eg har møtt andre som trur annleis, men likevel meinar at deira tru er den einaste rette.  Derfor er eg også skeptisk til all tru og påståeleg sanning.

Uansett ser eg fram til 21. desember. Då snur næmleg sola!! Vintersolkverv er notert i almanakken. Frå den dagen vert dagane berre lysare framover. (Om ikkje kloden går i oppløysing, då)

TELLOS = SLUTT