ROMJULSKRIG

Arkivfoto.
(av hensyn til den skadelidande i
noverande situasjon)

Eirik Lyseraude har skaffa seg ein fiende i nærmiljøet. Kvar kveld stikk han sørover og er borte vekk heilt til neste morgen. Då kjem han luskande inn døra med blodigt, reve skinn, frynsete øyrer og såra blikk. Han er so mørbanka at han orkar ikkje anna enn å sove i ei lun krå nær omnen. Han oppnådde mykje omsut og sympati, fyrste par dagane. 

Etter 3. dagen snudde kjenslene til forargelse. - Du skal no aldri lære heller.  Hald deg heime! Det er faktisk jul, skjenner eg. Mi reprimande er likevel mild samanlikna med dei greske skjellsorda som haglar over pelsdyret.  Eg føler eg må ta den arme skapningen litt i forsvar, tross alt, i frykt for at pusen skal få varige psykiske mèn. -Husk han er KATT, ikkje hund. Kattar er sjølvstendige skapningar og let seg ikkje dirigere. Nei. Jau, han forstår alt eg seier, Eirik Lyseraude er ingen dumming, påstår mannen. Mulig det, men han gjer likevel akkurat det som passar han. Og han er faktisk ganske dum, når han gong på gong går til angrep på sin overmann, og ikkje kan ta tapet som ein ”vanleg mann”.

Husarrest, avgjer husbonden, då veit vi kvar han er. Tørkar du opp etter han også? Ymtar eg. Svaret uteblir. Uansett skal vi gå inn i nyåret med fred og fordragelegheit, bestemmer eg. Krig og elende skal vere attendelagt og gløymt.

GODT FREDFYLT NYTT ÅR 2013 =

EFTIXISMENO TO NEO ETOS 2013, ME IRINI!!